८० आणि ९० च्या दशकात जन्माला आलेल्या कुठल्याही मराठी मुलाला अशोक सराफ हे नाव माहिती नाही हे शक्य नाही. कारण, शनिवार – रविवारी लागणारे त्यांचे चित्रपट पहातच ही पिढी मोठी झाली आहे. महामहीम राष्ट्रपतींच्या हस्ते त्यांना पद्मश्री पुरस्कार स्वीकारताना पाहून सर्वांना अतिशय आनंद झाला.
त्यांच्या अनेक भूमिकांपैकी मला अत्यंत आवडलेली भूमिका म्हणजे "कळत नकळत" या चित्रपटातला त्यांनी साकारलेला "सदा" अर्थात् "सदूमामा". हा चित्रपट स्मिता तळवलकर यांची निर्मिती होती.
ही चित्रपटातली सहाय्यक भूमिका आहे. नायिकेचा भाऊ म्हणजेच नायिकेच्या मुलांचा पापड लोणची विकणारा मामा अशी ही भूमिका आहे. म्हणजेच या भूमिकेत ग्लॅमरस असं काहीही नाही. पण, तरी देखील हा चित्रपट म्हंटला की सदा आठवतो.
एखादा कुशल माणूस कसा एखाद्या कामाचं सोनं करतो हेच यातून आपल्याला दिसतं.
या सदाच्या बहिणीचा संसार मोडतो का काय अशी परिस्थिती आहे, त्याची त्याला चिंता आहे, तो संसार टिकावा अशी त्याची ईच्छा आहे पण नवरा बायकोचं भांडण असल्यामुळे त्याला काही बोलता पण येत नाही अशी परिस्थिती आहे. हे सगळं त्यांनी ज्या प्रकारे आपल्या अभिनयातून दाखवलंय त्याला तोड नाही.
बरं हे सगळं तर आहेच. पण, तो परिस्थिती नी थोडा कमजोर झालाय कारण, त्याची नोकरी गेली आहे. नोकरी गेल्यामुळे घरात नकारात्मक वातावरण निर्माण होऊ नये म्हणून तो सारखी विनोदनिर्मिती करतोय आणि आपली आई आणि बायको यांच्या सहाय्याने पापड लोणची विकण्याचा व्यवसाय मोठ्या जिद्दीनी करतोय. हे सगळं काय अप्रतिम केलंय हे खरोखर शब्दात सांगू शकत नाही.
अशोक सराफ नेहमी म्हणतात की, मी कॉमेडियन नाही. मी कॅरेक्टर आर्टिस्ट आहे. लोकांना माझी कॉमेडी जास्त आवडली.
असे काही चित्रपट पाहिले की आपले मराठी नट किती आधीपासून कसदार अभिनयातून लोकांची मनं जिंकताहेत हे लक्षात येतं. केवळ मनं जिंकताहेत असं नाही तर, लोक सुद्धा त्यांना सुपरस्टार म्हणून डोक्यावर घेऊन नाचताहेत हे पाहून खरोखर आनंद होतो.
केवळ, छान गोरा गोमटा दिसतो म्हणून एखाद्या नटामागे आपण धावत नाही त्याचा अभिनय पाहतो. "चोखंदळ रसिक" म्हणजे अजून काय असतं.
आज हिंदीत पंकज त्रिपाठी सारख्या उत्कृष्ट नटांना प्रसिद्धीचं एक वलय मिळतंय. पण मराठीत हे आधीपासूनच आहे.
बरं, अशोक सराफ हे कुठल्या ड्रामा स्कूल मधून प्रशिक्षण घेऊन आलेले नाहीत. त्यांनी स्वतःच्या प्रतिभेतून हे सगळं फुलवलंय.
ही भूमिका इतकी अप्रतिम आहे की, चित्रपटाची पाहिली फ्रेम ही त्यांच्या अभिनयातून सुरू होते आणि चित्रपटात शेवटचा डायलॉग सुद्धा त्यांचाच आहे.
ही त्यांची झाली एक भूमिका. पण, असं त्यांच्या प्रत्येक भूमिकेवर आपण लिहायला बसू शकतो. आपल्या जबरदस्त अभिनयाने केवळ विनोदीच नाही तर, कधी खलनायक, कधी घाणेरडा राजकारणी कधी परोपकारी मनुष्य अशा सगळ्या भूमिका करत मराठी चित्रसृष्टीवर ३–४ दशकं त्यांनी अक्षरशः राज्य केलं.
मराठी कलासृष्टी ही श्रीमंत का हे पाहायचं असेल तर अशोक सराफ यांच्यासारख्या नटांना पाहून अगदी सहज कळेल.
पुढच्या काळात देखील अशोक सराफ यांच्याकडून अशाच उत्तमोत्तम भूमिका होत राहोत हीच प्रार्थना.
सुरेख लेखन ✨
ReplyDelete