"ब्रिटन, ब्रिटिश लोक, त्यांच्या संसदेची भली मोठी इमारत, त्यांच्याकडची अजूनही असलेली राजेशाही ही आपल्याकडे अजूनही आकर्षणाचा, टीकेचा, रागाचा भाग आहे.
राग आणि टीका यासाठी की त्यांनी आपल्यावर दीडशे वर्ष राज्य केलं.
आकर्षणाचा भाग यासाठी की त्यांच्या राणीचं गॅलरी मधून हात दाखवणं, त्याच्यासाठी लोकांचं रस्त्यावर येणं, राजघराण्यातल्या लोकांचे शाही विवाह, त्यासाठी बग्गीतून निघणाऱ्या मिरवणुका या सर्व गोष्टींमुळे.
राजेशाही हा ब्रिटिश राष्ट्रजीवनाचा एक महत्त्वाचा भाग आहे हे नक्की. राजेशाही म्हणजे आपल्याकडे जसा राष्ट्रपती हा नामधारी प्रमुख असतो तसा तिथे राजा किंवा राणी राज्याची प्रमुख असते.
इंग्लंड ची राणी एलिझाबेथ दुसरी ही त्यांच्या इतिहासातली सर्वाधिक काळ राज्यावर असलेली राणी ठरली. तिच्या काळात, तिच्या घरात आणि ब्रिटन मध्ये अनेक घटना घडून गेल्या. अनेक वादळं आली, अनेक चांगल्या वाईट गोष्टी घडल्या. अशा या राणी एलिझाबेथ वर एक उत्तम वेब सिरीज होऊ शकते असं तिथल्या प्रतिभावान लोकांना वाटलं आणि त्यातून "The Crown" ही एक अप्रतिम कलाकृती जन्मली.
ही एलिझाबेथ राणी गादीवर आली ते साल होतं १९५३; त्यामुळे त्याच्या एक - दोन वर्ष आधीपासून कथा सुरू होते. विवाहाच्या पूर्वीचं तिचं जीवन, तिच्या नवऱ्याला सैन्यात जाऊन काहीतरी करायचं असतं पण, राजघराण्यातल्या व्यक्तीशी लग्न केल्यामुळे त्याला ते करायला न मिळणं, तिच्या वडलांचा मृत्यू आणि अवघ्या २१ व्या वर्षी तिचं गादीवर येणं या सर्व गोष्टींनी सिरीज ची सुरुवात होते आणि पुढे रंगत येतच जाते.
मालिकेत वापरलेली रंगभूषा, वेशभूषा, उभा केलेला काळ, त्यांच्या वागण्या बोलण्याच्या पद्धती, मालिकेत दाखवलेले महाल या मुळे मालिकेत आपण पाहिल्या फटक्यातच ओढले जातो.
नट आपल्या चेहऱ्यावरच्या प्रत्येक रेषेतून, आपल्या हावभावातून आपल्या भावना व्यक्त करत असेल त्याला जोड म्हणून असणारं तितकंच चपखल संगीत असेल कुठेही अनावश्यक गाजावाजा नसणारी दृश्ये असतील तर चोखंदळ रसिकांसाठी ती नक्कीच पर्वणी ठरते.
शिवाय, कथाकाराचं ऐतिहासिक घटनांमधून नाट्य टिपण्याचं कसब हे सुद्धा अशा कलाकृतीत महत्त्वाचं ठरतं.
या मालिकेत ब्रिटिश रंगभूमीवरच्या अनेक दिग्गज नटांनी अभिनय केलाय. राणीच्या भूमिकेत पाहिल्या दोन सीझन्स मध्ये Claire Foy (तरुण वयातली राणी), दुसऱ्या दोन सीझन्स मध्ये Olivia Coleman आणि अखेरच्या दोन सीझन्स मध्ये Emelda Staunton यांच्या भूमिका आहेत.
दर दोन सिरीज नंतर संपूर्ण कलाकार बदलेले आहेत. पहिल्या दोन सीझन्स मध्ये नवखी राणी, तिसऱ्या आणि चौथ्या सीझन मध्ये राज्य कारभाराला सरावलेली राणी आणि पाचव्या आणि सहाव्या सीझन मध्ये अनुभवी, पोक्त राणीचं चित्रण आहे.
ब्रिटिश राजकारणात आपला ठसा उमटवणाऱ्या विन्स्टन चर्चिल, हॅरोल्ड विल्सन, मार्गारेट थॅचर, टोनी ब्लेअर यांच्यासारख्या वजनदार व्यक्तीमत्वांशी राणीचा संबंध, त्यातले कलगीतुरे त्याची एक - एक बाजू ही नक्कीच पाहण्यासारखी आहे. राणी - जिच्याकडे वंश परंपरेनी सत्ता आहे आणि लोकनियुक्त सरकारचा पंतप्रधान यांच्यात नातं कसं असतं हे सुद्धा खूपच उत्कृष्टते नी दाखवलं आहे.
राजघराण्यातल्या लोकांना देखील भावना असतात आणि त्यांना देखील अनेक तडजोडी कराव्या लागतात. त्यांची होणारी विचित्र ससेहोल्पट हा सुद्धा सिरीज चा एक उत्कृष्ट पदर आहे.
एक उत्तम ब्रिटिश कलाकृती; जी संहिता, अभिनय, नेपथ्य, पार्श्वसंगीत, लेखन या सर्व दृष्टींनी प्रेक्षक, अभिनयाचे विद्यार्थी, समीक्षक सर्वांचेच लक्ष वेधून घेते असं या series चं वर्णन करावं लागेल.
तर, अशी ही "The Crown" नक्कीच पहायला हवी.
Comments
Post a Comment